இசைத் தமிழுக்கு இதய காணிக்கை

இசைத் தமிழுக்கு இதய காணிக்கை 

இசைத்தமிழே உனைப் புகழ்ந்திடவே 

இயற்றிடுவேன் புதுக்கவிதை பல

கவிதைக்குப் பண் அமைப்போம் 

அதை தாளமுடன் பாடிடவே.

    கேட்பவர்கள் உருகிடவே - அதை 

    இனிமையுடன் இசைத்திடுவோம் 

    தமிழிசையின் இயல்பதென -பிறர் 

    பிறர் மொழிந்திடவே வாழ்ந்திடுவோம் . 

இயலுடனே இசை வளர்த்த தமிழினமே 

இன்றுன் இசைத்தமிழின் நிலையென்ன

தமிழிசைக்கு குரல்கொடுக்க வேறு பலர் 

வந்த நிலை அவலநிலையில்லையன்றோ.

    தொன்மையுள்ள தமிழிசைக்கு 

    தரணியில் நிகர் எதுவுமில்லை 

    தன்மானம் குறையாமல் - அது 

    தழைத்தோங்க பாடுபடு.   

                                        7.2.1980

அன்னையின் ஆதரவுக்கு...

அம்மா பாவத்தால் என் ஆன்மா 

அழிந்து விடுமென் றஞ்சுகிறேன் 

தாபம் நிறைந்தே நான் உன்னை 

அண்டி வருகிறேன் ஆதரி நீ . 

    நேசத்தாயே இறைமகனை 

    எமக்கு ஈன்று தந்தாயே 

    வேந்தனை ஈன்று தந்தமையால் 

    மாந்தரின் மாதா ஆனாயே . 

மதுரமும் சாந்தமும் நிறைந்தவளே 

மானிடர் எம்மை ஏற்றருளே 

கிருபை தயாபம் உடையவளே 

கிறிஸ்துவோடேம்மை சேர்த்தருளே . 

      ['கடவுளின் பிரதிநிதி '  மாத இதழில் பிரசித்தம் செய்தது No.260, September 1977]